Որոշումների ընդունում․ վարքագծային շեղումների ազդեցությունը

Այս թեմայով առաջին 2-օրյա դասընթացը տեղի կունենա մարտի 4-ին (ժամը՝ 18։30-21։00) և մարտի 5-ին (ժամը՝ 19։00-21։30), որի ավարտին ՀՀ ՊԵԿ «Ուսումնական կենտրոն»-ի կողմից կտրվի հավաստագիր:

Պետական կառավարման համակարգում ընդունվող որոշումները էական ազդեցություն ունեն հասարակական, սոցիալ-տնտեսական և ինստիտուցիոնալ գործընթացների վրա։ Այդ որոշումների որակը մեծապես կախված է ոչ միայն իրավական և կարգավորիչ շրջանակներից, այլ նաև մարդկային գործոնից՝ մասնավորապես որոշում ընդունողների վարքագծային առանձնահատկություններից։

Միջազգային և տեղական փորձը ցույց է տալիս, որ որոշումների ընդունման գործընթացում հաճախ դրսևորվում են վարքագծային շեղումներ, որոնք կարող են հանգեցնել ոչ օպտիմալ, կողմնակալ կամ կարճաժամկետ մտածողությամբ պայմանավորված որոշումների։ Նման շեղումները հաճախ անգիտակցական են, սակայն դրանց ազդեցությունը կարող է ունենալ զգալի հետևանքներ՝ որոշումների արդյունավետության, ռիսկերի կառավարման և հանրային վստահության տեսանկյունից։

Այս համատեքստում անհրաժեշտ է պետական համակարգում աշխատող մասնագետների կարողությունների զարգացում՝ ուղղված վարքագծային շեղումների ճանաչմանը, դրանց ազդեցության նվազեցմանը և ավելի հիմնավորված որոշումների ընդունմանը։


Դասընթացին կարող են մասնակցել՝

● պետական ծառայողներ,
● միջին և ավագ օղակի ղեկավարներ,
● ծրագրերի և գործընթացների պատասխանատուներ,
● պետական կառավարման ոլորտում որոշումների ընդունման մեջ ներգրավված մասնագետներ։

Դասընթացի ավարտին մասնակիցները կկարողանան՝

● ավելի գիտակցված մոտենալ որոշումների ընդունման գործընթացին,
● ճանաչել և հաշվի առնել վարքագծային շեղումների ազդեցությունը,
● բարձրացնել իրենց ընդունած որոշումների հիմնավորվածությունն ու կանխատեսելիությունը,
● նպաստել կառավարչական արդյունավետության ընդհանուր աճին։