«Ընդհանուր և գործնական ռուսերեն հարկային ծառայողների համար» թեմայով երկամսյա դասընթաց
Օտար լեզուների իմացությունը սպասարկման ոլորտում հիմնական աշխատանքային գործիքներից է: Լեզվի արդյունավետ ուսուցումը երաշխավորում է, որ անհատները կարող են հստակ արտահայտվել և հասկանալ ուրիշներին՝ հեշտացնելով հարթ փոխազդեցությունները հատկապես մասնագիտական միջավայրերում:
ՀՀ ՊԵԿ Ուսումնական կենտրոնում մայիսի 3-ին տեղի ունեցավ «Ընդհանուր և գործնական ռուսերեն հարկային ծառայողների համար» թեմայով երկամսյա դասընթացի մասնակիցների հավաստագրերի հանդիսավոր հանձնման արարողությունը:
«Ռոսսոտրուդնիչեստվոյի» ներկայացուցչության և ՀՀ ՊԵԿ «Ուսումնական կենտրոն»-ի համատեղ կազմակերպած դասընթացների արդյունքում Հարկ վճարողների սպասարկման վարչության 50 աշխատակից հնարավորություն ունեցան բարելավել և խորացնել ռուսաց լեզվի իմացությունը: Դասընթացները տեղի ունեցան և՛ առցանց, և՛ առկա տարբերակներով:
ՀՀ ՊԵԿ «Ուսումնական կենտրոն»-ի Ուսումնական մասի պետ Գոռ Վարդանյանը շնորհակալություն հայտնեց կազմակերպիչներին, դասընթացավարներին և կարևորեց այն փաստը, որ աշխատակիցները հատկապես ուրախ էին, որ կար առցանց միացման հնարավորություն, ինչի շնորհիվ դասընթացներին կարողացան միանալ մասնակիցներ Հայաստանի բոլոր մարզերից:
«Մասնակիցների գոհունակությունը պայմանավորված է առավելապես նրանով, որ դասընթացները վարում են լեգենդար ռուսագետ Լիլիա Բալասանյանը և Կապանի աստղ Լյուդմիլա Աղախանյանը։ Նրանք ոչ միայն որակյալ դասավանդում, այլ նաև բարեհամբույր մթնոլորտ են ապահովել», — նշեց Երևանի Ռուսական տան ղեկավար Վադիմ Ֆեֆիլովը։
Լեզվի ուսուցումը ոչ միայն քերականության և բառապաշարի յուրացումն է, դա իմաստալից մտքեր կազմելու, գեղեցիկ հաղորդակցվելու և անձնական աճին նպաստելու միջոցներից մեկն է:
