«Հուզական բանականություն» թեմայով դասընթաց
Արդյունավետ ղեկավարումը ներառում է մի շարք հմտությունների և որակների առկայություն, որոնցից է հուզական բանականության կառավարումը։ Ուստի, կառավարման գործընթացում հաջողելու համար էական նշանակություն ունի թե՛ ղեկավարի, և թե՛ աշխատակիցների հույզերի ճիշտ կառավարումն ու դրանց ուղղորդումը գործառույթներն իրականացնելիս։
Հուզական բանականությունը վերաբերում է սեփական և ուրիշների հույզերը ճանաչելու, հասկանալու, կառավարելու և ազդելու կարողությանը: Այն վճռորոշ դեր է խաղում այն բանում, թե ինչպես ենք մենք շփվում ուրիշների հետ, կառավարում սթրեսը և որոշումներ կայացնում:
Կարևորելով փափուկ հմտությունների շարունական բարելավումը և զարգացումը` ՀՀ ՊԵԿ Մաքսային ծառայության ղեկավար պաշտոններ զբաղեցնող պաշտոնատար անձանց համար կազմակերպված «Կառավարչական հմտություններ» դասընթացի շրջանակներում «Հուզական բանականություն», «Կառավարման հմտություններ» և «Առաջնորդման հմտությունների զարգացում» թեմաներով եռօրյա դասընթաց վարեց կառավարման ոլորտում 16 տարվա փորձ ունեցող, բժիշկ, բիզնես խորհրդատու, մոտիվացիոն խոսնակ, 2005 և 2008 թվականներին «Եվրոպայի լավագույն առաջնորդ» ճանաչված, 2017 թվականին «Գործարար կանայք» մրցույթի նոմինանտ, «Հավասարակշռության կետ» գրքի հեղինակ, քոուչ, դասընթացավար Գոհար Դավթյանը ։
- Հուզական բանականության կառավարումը իր մեջ ներառում է՝
- Ինքնագիտակցություն-սեփական հույզերը, ուժեղ, թույլ կողմերը, արժեքները և մղումները ճանաչելու և հասկանալու կարողություն:
- Ինքնակարգավորում- հույզերը, ազդակները և ռեսուրսները կառավարելու և ուղղորդելու կարողություն, ինչը թույլ է տալիս հանգիստ և զսպված հոգեվիճակում որոշումներ կայացնել։
- Մոտիվացիա- նպատակներին եռանդով և համառորեն հասնելու ճանապարհը հաճախ պայմանավորված է ոչ թե արտաքին պարգևներով, այլ ներքին գործոններով:
- Կարեկցանք-ուրիշների զգացմունքները հասկանալու և կիսելու ունակություն, ինչը թույլ է տալիս ավելի լավ միջանձնային հարաբերություններ հաստատել և հաղորդակցվել:
- Այլն։
Քանի որ կառավարումը ներառում է նպատակներին հասնելու համար նաև անհատներին կամ թիմերին ուղղորդող, ազդող և ոգեշնչող գործառույթների ապահովումը, ապա զարգացող հուզական ինտելեկտը կարող է հանգեցնել հարաբերությունների բարելավմանը, ավելի լավ հոգեկան առողջությանը և ավելի մեծ հաջողությունների առկայությանը անձնական և մասնագիտական միջավայրերում:
